تخطى إلى المحتوى

تجربتي مع الروكتان بالتفصيل

    تجربة إحدى السيدات: 

    بصراحة حالتي كانت يرثى لها وكنت تعبانة مرة من موضوع حب الشباب لكن استمريت على الكريمات والخلطات مو لأني واثقة بهذي العلاجات لا بس كنت خايفة من موضوع الحبوب بصراحة يعني من اضرارها وكذا، المهم بعد فترة وصلت حدي فعليا! يعني لدرجة صرت ما اطلع وما اروح المناسبات بسبب حب الشباب يعني خانقتني المشكلة فقررت اروح المستشفى واشوف حل وقابلت الدكتور وكلمته عن المقشرات وعلى طول قال وقفي وصراحة خفت.

    قالي وجهك مو طبيعي والمشكلة مو من البشرة نفسها وانا في بالي فيه شي معين لكن خلينا نسوي تحاليل دم اول شي ووافقت وسوا التحاليل وبعدها لما رجعت له قالي طلعت النتيجة وانتي عندك إفرازات دهنية غير منتظمة من الكبد وبشكل مكثف لأعلى الجسم وهالشي ما تقدرين تحلينه بكريمات ومقشرات ولازم شي داخلي يوازن الدهون.

    وبعدين بديت العلاج وكانت فترة علاجي 7 شهور وكنت استهلك حبتين يوميا على توصية الطبيب ومن اول شهرين الحبوب خفت بشكل واضح وانا ما عطوني كورس تقشير اساسا، بس صرفوا لي واقي نتيروجينا وغسول طبي ولوشن ومن ذاك الوقت انا مستمرة على هالواقي وصراحة نتيجته مميزة وانا كنت بنفسي أسوي تقشير في البيت والحمدلله الأمور كانت تمام وانبسط الدكتور بعد شهرين بالنتيجة وقال تحسن كبير ما شاء الله وفعلا الوجه صفى بشكل كبير. 

    المقشر الي كنت استعمله عبارة عن خل تفاح كمية قليلة في الفنجان واضيفه فيه شوية موية وبعدين اخذ قطنه وابللها فيه وامسحها على وجهي لمدة 15 دقيقة وكنت أحاول الهي نفسي عشان ما أحس بالوقت واتفيق للموضوع والحمدلله قدرت، ومثل ما قلت النتيجة كانت جميلة جدا حتى المسامات والرؤوس السوداء اختفت بشكل كبير وما حسيت بالدهون ابدا، يعني ما شاء الله دواء فعلا جميل ومفيد جدا.

    وعن موضوع الاعراض بصراحة هالشي راجع للمريض غالبا، لأن لو اهتميتي بنفسك بشكل كبير واتبعتي نصايح الطبيب امورك سليمة وراح تخف اعراضك كثير واساسا الحبوب اعراضه كثيرة وخطيرة ومتعبة يعني يبغالك اهتمام قوي ولا راح تصيبك أشياء كثير وتندمين أنك اخترتي هالدواء، والاعراض هي جفاف الجسم بشكل عام وتقدرين تستخدمين مرطبات طبية مثل لوشن فازلين بالككاو او زبدت يعني حق الوجه.

    يمكن يعطيك غسول طبي أصلا وبإذن الله يكون مفيد، اما عن الانف والشعر فعلا اصابتني اعراض الجفاف يعني قمت اشم ريحة غريبة وكلمت الدكتور وقالي طبيعي وفترة وراح يرجع طبيعي اما عن الشعر يبغاله اهتمام زيوت وكذا وراح يرجع طبيعي ويمكن أفضل حسب الاهتمام وعندك الشفة راح تتأثر بالجفاف ويبغالها ترطيب بعد وتقدرين تحطين المرطب الي يختاره الدكتور او في خيارات ثانية مثل بيوزلين بشمع النحل او فازلين والأول ما شاء الله جميل جدا.

    وهذي كانت قصتي ويا هالدواء وفعلا عانيت كثير ولكن الحمدلله الحين كملت تقريبا 3 سنوات وما في حبوب ولو تطلع لي تكون صغيرة مرة وتكون حبة او حبتين بالكثير لكن عندي أثر في أحد الخدين ما راح لانه كان قوي شوي وانا سببته بالحك قبل لا ابدأ بالعلاج والحين أفكر اخذ شي يعزز الكولاجين وهي مادة مفيدة في البشرة وتساعد على تجددها وشفائها عشان يرتفع الجلد ويرجع الخد طبيعي مثل الدريما رول. 

    يعني الموضوع كله اهتمااااام! يعني فيه اعراض خطيرة على الجسم لكن مع شوية اهتمام راح تتبدد يعني انا سمعت كلام كثير وكنت خايفة لكن بسبب معاناتي مع حب الشباب تشجعت وبديت والحمدلله راضية كل الرضى الحين واساسا فيه تحليل دم تقريبا كل شهر عشان يشوف كل شي طبيعي ولا لا يعني بإذن الله امورك سليمة وفي شي ضروري تنتبهين عليه وهو الحمل! ممنوع تحملين. 

    في فترة العلاج او بعدها بشهر او شهرين ويمكن ثلاثة بعد لأن هذا الدواء يسبب تشوه اجنة يعني بعد ما تخلصينه بستة أشهر تقريبا مسموح لك تحملين او تسوين تحليل دم وتشوفين آثاره اختفت ولا باقية عشان تقدرين تحملين وانتي متطمنة بشكل كامل والحمدلله، الله يرزقكم كل خير ويعافيكم ويفرج همكم ويرزقكم كل ما تتمنون يارب. 

     

    تجربتي مع حبوب زيراكتان 

    تجربة أحد الرجال: 

    انا بصراحة ما كنت اعاني كثير من الحبوب بس في معاناة بسيطة وتستاهل اني اتعالج وسمعت من صديق لي عن هذا الدواء وانه مفيد ومن هالكلام وقلت خلاص بجربه ورحت عند الدكتورة واقنعتها انه ودي اخذ ووافقت ووصفت لي إياه عشان ابدا العلاج وحذرتني من موضوع الجفاف وانه ممكن ياثر على الكلى ولازم اكثر من شرب الماء واحافظ على رطوبة الجسم عشان ما ياثر على صحتي بشكل عام يعني وقلتلها تمام وطبيعي بحافظ في النهاية تراها صحتي.

    حللت وخلصت واخذت الدواء من عندها وكنت استخدم 20 ملج طول فترة العلاج وما غيرت كمية الجرعة ابدا لين ما خلصت والسبب كان انه وزني كان ناقص ومب زين اكثر الكمية حسب ما اذكر وفي اول شهر ما حسيت بشي ابدا يعني ما في جفاف مثل ما قالت ولكن في الشهر الثاني بدا الجفاف والتقشير لدرجة احتجت استخدم الكريمات والمرطبات الي وصفتهن لي واستخدمتهم وتحسن شكلي وخف الجفاف وكنت اشرب ماي بكميات كبيرة يوميا عشان الكلى.

    كنت اشرب يوميا حوالي 2 لتر وهي قالت المفروض ثلاثة ونبهتني اني اكل فواكه مكس ووالله ما اعرف السبب لكن اقولكم الي قالت لي اسويه وترا العلاج للجسم كامل مو بس للويه يعني كل شيء وفعلا فادني ومن الشهر الثاني حسيت بتغيرات ولكن لما وصلت الشهر الخامس او السادس ما أتذكر المهم رحت لها وقالت لي خلاص مش لازم تكمل وحالتك ممتازة وانا سمعت انه هالشي غلط ولازم اخلص العلاج ومدته تكون 7 شهور او 8. 

    لكن من الأساس حالتي ما كانت تستدعي اني استخدم هذي الحبوب يمكن عشان كذا قالت لي وصلت للحالة الممتازة قبل لا تكمل 7 اشهر او 8 والحمدلله والحين بعد فترة طويلة تطلع لي حبوب بس صغيرة مرة والاثار ما راحت كلها يعني بقى منها شوي شي بسيط يعني والي فهمته منها في فترة العلاج لازم اكل اكل صحي وما اعرف السبب بعد، والحمدلله خلصت علاجي على خير وتعب علاجي كان شبه معدوم يعني ما تعبت وايد والكلام التخويفي الي سمعته قبل ما صار لي يمكن لأني التزمت بالترطيب والاكل وهالسوالف. 

     

    تجربتي مع حبوب كوراكني 

    تجربة أحد الرجال: 

    أولا يا اخواني انا كنت اعاني من موضوع الحبوب في الوجه والظهر بشكل كبير لكن الي في ظهري كانو اكثر بكثير من الوجه وجربت خلطات وكريمات وحتى في الحلاق التنظيف وغيره من الأمور لكن للأمانة ما فادني شي حسب ما اذكر، المهم بعد فترة سمعت عن هالمنتج وجربه أحد الاقرباء وشفت النتيجة بعيني والله ممتازة جدا معنه قريبي من الأساس حبوبه مش كثيره، المهم قلت خلاص انا بعد باخذ وبجرب ورحت عند الدكتورة الي يتعالج عندها وكلمتها وحسيت مش راضية تعطيني وبعد الكلام قالت لي طيب اشوف ظهرك ووريتها واقتنعت الحمدلله وعطتني وبديت رحلة علاجي.

    لكن قبل لا ابدأ حسب ما اذكر سويت تحاليل دم ودهون ثلاثية ومن هالكلام عشان تشوف ينفع لي ولا لا والحمدلله طلعت النتايج طيبة وبديت، وعلى أساس الكورس 6 أشهر لكن انا بس كملت أربعة ووقفت وبقولكم بعدين السبب المهم وصرفت لي الحبوب وحذرتني من كذا شي واولهم الجفاف! قالت لي راح يصيبك جفاف قوي وحتى الشفايف بتتقطع ومن هالكلام وانا بشرتي دهنية، وأكدت علي أكثر من مرة لازم اشرب ماي بكميات كبيرة! وحتى قريبي الي خبرني عن الموضوع نبهني اني اشرب ماي وايد.

    المهم حسب ما اذكر جرعتي كانت وحدة ما تغيرت واعتقد كانت 20 ملغ وفادتني بشكل كبير يعني حبوب الوجه راحوا ولي سنوات من هالسالفة وإلين اليوم لو تطلع لي حبة تكون مرة صغيرة وبالشهرين او 6 أشهر مرة تطلع وتختفي بكم يوم! والي في ظهر مرة انمسحو مسح ما في أي شي حتى الاثار راحت! يعني مو طبيعي الدواء والحمدلله هذا الي كنت ابيه يعني نتيجته ممتازة جدا جدا وانصح فيه للي بيلتزم بكلام الدكتورة الخاصة بعلاجه.

    عن موضوع التعب، انا أتكلم عن نفسي يعني تحمل الأشخاص يختلف خصوصا من البنت للولد، بالنسبة لي ما تعبت والجفاف كان قوي بس كنت أكثر من شرب الماي وكنت اخذ الحبوب قبل النوم او في الصباح ما اذكر لكن متأكد بعد ما اكل أخلص بفترة اخذهم، وما طلعت علي اعراض غير الجفاف وسبب التوقف كان بدون سبب!! ما امزح فعلا وقفت بدون أي سبب ماعرف مليت من العلاج الطويل وشفت نتيجة حلوة وقلت مش لازم أكمل برايه.

    لكن للحين عندي اثار حبوب خفيفة يمكن لأني ما كملت الكورس كامل وقفت عند الشهر الرابع، بس كملت فوق الخمس او ستة سنوات وللحين ما يطلع حب الشباب الحمدلله يعني تعالجت وانا يمكن عمري 20 تقريبا او 22 والحين بدخل 27 وانا اخبركم عن التجربة الي مريت فيها! والحمدلله شي بسيط وسهل ولحد يخوفكم إذا مشيتوا على كلام الدكتور خطوة بخطوة بإذن الله راح تطلع لكم نتيجة مميزة، وإذا البنات ناويين يستخدمونه ينتبهون خصوصا المتزوجات لأنه يشوه جنين الحامل يعني تحملين بعد كورسج بستة او 4 أشهر حسب توصية الطبيب، ولحد ياخذه بدون فحص وتحاليل لأنه ممكن يهيج البشرة يعني ما ينفع بدون اشراف الطبيب.

     

    ملاحظة: كوراكني وزيراكتان وركتان هم نفس المنتج بجانب اختلاف مكان الصناعة والسعر والشركة حسب المتداول، القصص كلها حقيقية وحدثت منذ سنوات ولكن استشارة الطبيب امر هام جدا لأن جسمك قد لا يتقبل الدواء عكس باقي الناس ونتمنى لكم موفور الصحة والعافية ودمتم بخير.