تخطى إلى المحتوى

تجربتي مع الروكتان والحمل

    تجربة إحدى السيدات: 

    أولا معلومة لكم تقدرون تسوون تحليل دم وتشوفون راح مفعولها ولا لا عشان تقررون ودكم تحملون أو لا، المهم انا كنت ماخذه كورس من الحبوب هذي وطبعا الكورس يكون حوالي 6 إلى 8 اشهر وما إلى ذلك وانا متزوجة وقالي الدكتور قبل انه يمنع حملي وقت العلاج لأن الطفل راح تصيبه تشوهات ومن هالكلام ووصلت لأخر حبة من العلاج واخذتها قبل الدورة بأسبوع تقريبا! وما جاتني الدورة وانتظرت وبعدين رحت فحصت وسبحان الله طلعت حامل!! والله اني انكسرت وخفت كثير جدا من الموضوع.

    زرت الطبيب وعلمته بالي صار وطلبت منه تقرير عن حالتي ورفض يعطيني بسبب خوفه انه الطفل يمكن يطلع متشوه بسبب العلاج الي وصف لي إياه وطمأنته وقلت له انت سويت الي عليك ونبهتني كم مرة والغلط علي وانا احتاج الأوراق عشان اروح عن استشاريين ودكاترة ويصدقون حالتي ومن هالكلام وبعدين اقتنع وعطاني جزاه الله خير، وبعدين رحت عند دكتورة وكنت ابي أسقط الي في بطني قبل نفخ الروح لأني سمعت حرام التسقيط بعد النفخ وحتى قبل النفخ في حالات محرمة وما تجوز، وكنت خايفة جدا من الموضوع.

    المهم قالت لي الدكتورة حاليا ما في شي ومجرد كيس وإذا استمر كذا احتمال ما بتحملين، وقالت تعالي بعد أسبوع ورحت وفحصت ونفس الكلام ورحت بعد سبعة أيام وقالت لي كيس وفي الأسبوع السادس صدمتني انه فيه نبض! وخلاص هنا ما قدرت أجهض وكملت وانا خايفه وافحص والدكتورة جزاها الله خير كل مرة تطمني وتساعدني وليين بعد فترة في الشهر السادس والخامس والأمور طيبة، وكنت أكثر من الدعاء والرقية على طفلي لأن الأمور كلها بيد الله سبحانه وتعالى.

    وصلنا لأواخر فترة حملي وبالفحوصات المتقدمة لتشوهات الطفل قالت لي الدكتورة ان الراس مو بحجمه وانه شوي اصغر وخفت كثير وأول مرة اشوفها خايفه وبعدين قالت تعالي بعد مدة يمكن يكتمل وما كان باقي كثير على الولادة ورحت لها ونفس الكلام وبعد فترة قليلة رحت لدكتور فحصني وطمني ان الأمور طيبة وان المخ اكتمل وبإذن الله الراس ما فيه شي وخذت التقرير لدكتورتي وارتاحت كثير وبعد فترة ربيت والحين الطفل في أواخر الشهر السابع من عمرة والحمدلله بصحة وعافية وحبيت اشارككم الموضوع وانبهكم لا تأخذون الدواء في وقت حملكم وإذا خلص الكورس انتظروا فترة بعدين حاولوا في موضوع الولادة.

     

    تجربة إحدى السيدات: 

    انا ما اخذت هالمنتج لكن اخذت اكرتين والاثنين يعتبرون فيتامين أ والاكرتين للاستعمال الخارجي مو الداخلي، المهم وانا استخدمته تقريبا لمدة شهر قبل حملي وما كنت اعرف انه له علاقة بتشوهات الطفل المهم وبعدين حملت وانجبت وكان فيه عيوب خلقية وتوفى… وبعدين شكيت بموضوع الكريم الي كنت استخدمه وعرضته على اكثر من دكتور وقالي يسبب قصر أطراف وتشوهات هيكلية وخلقية، والسبب انه مكون من فيتامين أ وترينوين وهالمنتج الي نتكلم عنه عنده بعض مكونات الكريم الي كنت استعمله وحبيت اذكر تجربتي لعل وعسى أحد يستفيد منه ومعوضين خير بإذن الله وانتبهوا على أنفسكم، وقالت الطبيبة انتظري بعد كورسك 6 أشهر إلى 8 عشان يزول من الدم وهذا الله اعلم. 

     

    تجارب أخرى

    تجربة إحدى السيدات: 

    انا كنت استعمل هذي الحبوب وبعدين خلصت منها وبعد شهرين تقريبا حملت وصراحة كنت خايفة أكثر من اني فرحانة بسبب الخوف من تشوهات الجنين وكملت ادعي وفي وسط خوف ومن هالكلام إلين موعد الولادة ونزل الطفل الحمدلله وكان بصحة وعافية ووقتها صراحة ما همني شيء لا الآلام او خوف الولادة الأولى! كل همي كان التشوهات وبفضل الله تجاوزت المحنة وكل شيء طلع سليم بفضل الله سبحانه وتعالى. 

     

    تجربة إحدى السيدات: 

    انا ما انصح البنات يحملون بعد العلاج بشهر او شهرين! انا حملت بعدها بثلاث شهور وطفلي جاه شي في القلب الله يشفيه ويعافيه ولذلك أتمنى انكم تنتبهون فهو فعلا خطير وصديقتي بعد نفس الموضوع بنتها جاها شيء في القلب من هذا الدواء يعني انتظرو فترة آمنة أو اعملوا تحاليل الدم وشوفو إذا الدواء باقي في الدم وبعدين قرروا على موضوع الولادة وفوقها استشيروا الطبيب ما يضر يعني تحتاطون! والله يرزقكم كل خير يارب.

     

    تجربة إحدى السيدات: 

    انا اخذتها قبل الزواج بشهرين و15 يوم وبعدين تزوجت وكملت 4 شهور تقريبا وبعدين حملت يعني وقفتها تقريبا 4 أشهر والحمدلله الله رزقني ببنت ما فيها الا كل خير وصحة وعافية وهذا من فضل ربي، الأفضل تنتظرين فترة بعدين تحملين والأفضل تاخذين مانع قوي لأنه إذا حملتي في فترة العلاج احتمال كبير يسبب تشوهات للطفل! ودايما استشيري الطبيب وبإذن الله يعطيك الأكيد والأفضل. 

     

    المزيد من التجارب 

    تجربة إحدى السيدات: 

    انا كنت اتعالج بهذي الحبوب ومدة كورسي كانت 7 أشهر وبعدين وقفتها لمدة 6 أشهر والحمدلله بعدين جبت بنت وطلع ما فيها الا كل خير يعني اعتقد فترة الست شهور مناسبة ويمكن اقل بعد ما اعرف لكن هذا الي صار معاي وفي دكاترة يقولون صعب اثاره تروح انتظري شهور اكثر وفي منهم يقولون شهر او شهرين يكفوون عاد اسألي اكثر من دكتور عشان تكون عندك فكرة للفترة الأنسب.

     

    تجربة إحدى السيدات: 

    انا تعالجت به وما كنت حامل او متزوجة أساسا وقتها والحين بعد سنة ونص انا تزوجت وحملت وإلى الان ما ربيت واتوقع ما فيه الا كل خير ولكن وحدة من صديقاتي تعالجت به وخلصت وبعدها بستة شهور حملت وجابت ولد وبفضل الله سبحانه وتعالى ما كان فيه أي شي وبخير، يعني غالبا فترة الـ6 أشهر تكون آمنة لكن ما يضر تسألون الحريم والبنات عن تجاربهم وتروحون تسوون تحليل دم وتتأكدون في آثار للدواء في الدم ولا اختفى وبعدها تبدون حملكم، الله يجزاكم كل ما تتمنون وبإذن الواحد الاحد راح يجيكم طفل سليم.
     

     

    تجربة إحدى السيدات: 

    انا اخذتها قبل الزواج وصادتني اعراض كثيرة لكن مو بشكل مستمر يعني عادي تجيني يوم او يومين وتختفي فترة وترجع ومنها الجفاف سواء الوجه او العين وغيره وتشقق الشفاه والكسل والتعب وحتى جفاف الشعر، المهم كملت فترة وتزوجت وبدأت ترجع الحبوب من اول وجديد ورحت وقالولي هرمون الحليب مرتفع عندك وعالجت وبعد العلاج نفس الوضع ما تغير كثير. تجربتي مع الروكتان. 

    رجعت للدكتور الاولي وقالي طبيعي أساسا حب الشباب يختفي بكبر السن ولازم تعيدين كورسك من اول وجديد وانتي متزوجة يعني توقعين على ورقة أنك ما تحملين الا بعد الكورس بشهر يعني الموضوع كله بياخذ مني حوالي سنة!! والسبب انه ممكن يضر الطفل، المهم حبيت انبهكم انكم ما تعتمدون عليه بشكل كلي يعني من تحصلون النتيجة الحلوة حاولوا تحافظون عليها عشان ما تحتاجون تاخذونها من اول وجديد يارب فهمتوا الي اقصده. تجربتي مع الروكتان.